Páxinas

venres, 8 de xullo de 2022

Paseo nocturno en bici

Como habitualmente facemos ao comenzo do verán, o vindeiro sábado día 9 de xullo de 2022 ás 22:00 horas a Asociación Arousa en Bici en colaboración co Concello de Vilagarcía e Protección Civil organiza o tradicional paseo nocturno en bici.

É unha das actividades que se organiza coa intención de fomentar o uso da bicicleta na cidade.

O percorrido é o habitual. A saída será no parque do Cavadelo, iremos a Vilaxoán e a Carril e voltaremos ao parque do Cavadelo. Ao final celebrarase un sorteo de accesorios ciclistas e outras cousas entre todos os participantes.

Lembrádevos de revisar a vosa bicicleta e utilizade o equipo necesario (casco e chaleco, se tendes), así como de seguir as instruccións da organización. Recordade que é obrigatorio o uso do casco por menores de  16 anos.

Aconsellamos levar as bicis con iluminación, se é posible.

xoves, 2 de xuño de 2022

Día da bicicleta - Cambados

O vindeiro domingo día 5 de xuño celébrase en Cambados o día da bici que serve tamén como homenaxe a Ernesto Falcón, que foi director do Gran Premio do Albariño e da Ruta do Albariño Memorial Modesto Sánchez, Teto.
Arousa en Bici propón sumarse a este evento.

Saíremos do Parque do Cavadelo ás 9:30 h. Pasaremos por Vilaxoán, polo pazo de Rúa Nova ata a praza de Fefiñáns en Cambados para poder facer a inscrición.
A marcha ciclista en Cambados arranca ás 11:00 e terá un percorrido de 11 kilómetros (moi fácil) atravesando o casco urbano e pasando polas parroquias de Vilariño e Corbillón. Haberá premios para a bici máis orixinal, para a familia máis numerosa e para os ciclistas de menor idade e de maior idade, así como o sorteo de 6 bicicletas

  •     Ruta a Cambados
  •     Data: Domingo 5 de xuño de 2022
  •     Saída: parque do Cavadelo ás 9:30 h.

Contamos con todos vós e podedes facer partícipes as vosas amizades.
É obrigatorio o uso de casco. Cada un é responsable da súa seguridade.

DIFICULTADE: Moderada

luns, 18 de abril de 2022

Defensa e apoio das ciclovías e camiños escolares seguros en Vilagarcía


Desde este foro queremos manifestar a nosa repulsa pola actuación (ruído, máis ruído, falsidades, críticas sen propostas alternativas, …) de certos partidos coas peonalizacións primeiro, coas ciclovías despois e agora cos camiños escolares seguros. A primeira peonalización criticada foi a da praza de Galicia: ían perder as vendas os establecementos porque os coches non podían pasar. Só vían o que perdían (pouco máis de 5 prazas de aparcamento) pero nunca pensaron o que gañaban. Máis tarde foi criticada a peonalización da rúa Castelao e a de Vista Alegre, porque os nenos de determinado colexio non podían ser levados en coche ata a porta do establecemento.

Afortunadamente non se lles fixo caso e estas peonalizacións foron a máis, e xa sen críticas porque a maioría da poboación viu os seus efectos: máis xente paseando con nenos e comprando polas rúas, menos ruído, máis seguridade moito máis agradable a contorna. Quen volvería atrás agora?.

O mesmo ocorreu en Pontevedra. Perdéronse moitas prazas de aparcamento, pero gañouse moito en humanización e só era cuestión de andar de 10 a 15 minutos desde onde fora aparcado o coche para poder gozar da cidade nenos e maiores. Quen volvería a tempos pasados onde os coches devoraban á cidadanía? Acaso non merece Pontevedra agora todos os premios que levou polo seu modelo de cidade?

Agora o mesmo tipo de ruidosos enarbora o estandarte das críticas coas ciclovías e cos camiños escolares seguros: as ciclovías si pero non desta maneira (non din como). Eu creo que non as saberían facer porque non se asesoran e sobre todo non cren nelas. Din que son caras e só ven o gasto que se fai para construílas (iso si con axudas do Ministerio para a Transición Ecolóxica e de fondos de Europa que se non se proxectasen non se terían). Tamén din que ninguén quere, ninguén pediu e ninguén usa. É incerto porque desde hai anos está a demandalas Europa continuamente. É dicir: quéreas Europa, quérenas os cidadáns consecuentes coa problemática do clima e da contaminación e úsanas os cidadáns conscientes destes problemas; o seu uso está a aumentar gradualmente e están abertas a toda a cidadanía para que as usen e consigan beneficios tanto para a súa saúde como para a dos demais, para o clima, e fomentando o aforro.

Isto sábeno e corrobórano mesmo usuarios frecuentes de vehículos de motor que ben, por imposibilidade física, desidia, ou medo por non ter viais seguros non utilizan medios máis amables.

Desde hai tempo desde Europa e tamén noutras partes do planeta está a apostarse por unha mobilidade alternativa. Para iso créanse moitísimas axudas. Convidamos aos que critican queiran velo, e aprendan a velo.

Que on nos digan que "isto non é Holanda ou que aquí chove". Aquí non chove menos que en Holanda e fai moito menos frío e menos vento.

En Holanda antes da 2ª guerra mundial había moitas máis bicicletas que coches. Nos anos posteriores os coches foron invadindo o espazo das bicicletas e provocando accidentes polo que foi diminuíndo paulatinamente o uso da bicicleta. No ano 1971 producíronse 3.300 mortes por accidentes de tráfico, entre elas as de máis de 400 nenos. Unha situación insostible que derivou en movementos sociais de protesta e que foi a orixe de Stop de Kindermoord, un grupo activista que pretendía poñer fin ao que chamaban asasinato de nenos e que foi de vital importancia.

Pode verse este vídeo que ilustra moi ben as protestas: 

Stop de Kindermoord creceu rapidamente e púxose a traballar: levou a cabo manifestacións, ocupou puntos negros nos que se producían accidentes, e organizou días especiais nos que pechaba rúas para que os nenos puidesen xogar de forma segura. Co tempo, Stop de Kindermoord pasou a recibir subvencións do goberno, abriu o seu propio cuartel central nun local que anteriormente fora unha tenda, e empezou a xerar ideas coas que mellorar os plans urbanísticos e aumentar a seguridade. Á aparición de grupos como Stop de Kindermoord acabouse sumando a crise do petróleo de 1973, o cal foi aproveitado polo goberno para dar unha mensaxe clara: había que adoptar un novo estilo de vida e non malgastar enerxía.

E así, xa na década dos 80 e despois de que os políticos tivesen tempo de comprobar as vantaxes do uso das bicicletas, as cidades empezaron a introducir unha serie de cambios para facelas máis amigables con este medio de transporte. E aos poucos foise avanzando por este camiño e agora todos están convencidos do favorable deste cambio para todos.

Outros países de Europa empezaron máis tarde pero lévannos vantaxe: Alemaña, Austria, Italia, … En España tamén se avanzou moito, sobre todo en certas cidades: Vitoria, Sevilla, Barcelona, Zaragoza, … E agora preténdese conseguir tamén en Vilagarcía, pero certos sectores son remisos a calquera cambio e só ven o negativo. Non son capaces de ver o que gaña a sociedade.

Rúa Xunqueira na actualidade, antes de transformar en Camiño escolar seguro

O mesmo ocorre cos Camiños escolares seguros. Seguen os ruidosos. Tampouco ven a súa utilidade, que vén ser un complemento das ciclovías e das peonalizacións. Sacan bailes de cifras. Ata para contar os aparcamentos que segundo eles se anulan contabilizan os vehículos que habitualmente aparcan en zonas prohibidas e indican que se deben contabilizar aqueles vehículos que se estacionaban en lugares onde antes, xa carecían de permiso.

Os Camiños Escolares Seguros están avalados por moitas cidades de Europa. Cada vez hai máis. O seu gran impulsor en Europa foi o psicopedagogo italiano Francesco Tonucci. E estas son as cousas positivas que os avalan:

  • Devolven a autonomía aos nenos. "O primeiro paso para devolver a autonomía aos nenos é pedir que vaian á escola e volvan a casa sen ser acompañados polas persoas adultas" (Francesco Tonucci, A cidade dos nenos).
  • É unha iniciativa para que os menores se movan con seguridade polas rúas e recuperen o uso e goce do espazo público.
  • Que se despracen ao centro escolar andando ou en bicicleta de maneira segura favorece a súa saúde, combate enfermidades e malos hábitos, á vez que fai máis sostible o medio ambiente ao reducir o número de desprazamentos en vehículos motorizados (varios centenares no caso de Vilagarcía), co que, por riba, alixéirase o tráfico.
  • Os pais e as nais van gañar tempo e van quedar máis satisfeitos vendo que os seus fillos se moven con autonomía e alegría.

Por que sempre se queren poñer pedras no camiño a boas iniciativas? Por que non nos sumamos todos a elas se van ser boas? E sexamos positivos: propoñamos melloras ou correccións no caso de que fixesen falta e

apoiemos o positivo!

mércores, 2 de marzo de 2022

Ao pé da Ciclovía en Rodrigo de Mendoza

O pasado 25 de febreiro sobre ás 17:00 h fíxoxe unha consulta ao pé da Ciclovía de Rodrigo de Mendoza, moi preto do entronque coa avenida Doutor Tourón, aos  que pasaban á beira: peóns, ciclistas e xente en patinete. Tamén participamos na enquisa feita alí mesmo pola locutora Montse García a tres membros de Arousa en Bici: Pablo, Paco e Emilio. Publicouse no programa de Radio Arosa Hoy por hoy o día 1 de marzo. Foi interesante e xa constatamos que durante os 20 minutos que estivemos alí pasaron 10 personas en bicicleta e 8 en patinete. Dou a impresión que se empeza a usar cada vez máis.

 A idea era valorar ou, en todo caso, ter as primeiras impresións sobre o inicio das ciclovías en Vilagarcía. Pódese escoitar no enlace a partir do minuto 00:59:41

sábado, 15 de xaneiro de 2022

A polémica

Desde Arousa en Bici mostrámonos moi  apenados coas opinións que se están  vertendo en Vilagarcía coas novas ciclovías.

Obviamente defendemos esta nova infraestrutura contra vento e marea. Considerámola moi necesaria e gustaríanos que seguise crecendo cada día máis.

Moitos medios de comunicación, grupos políticos e veciños non deixan de criticar constantemente: perdida de prazas aparcamento, pintura que se borra coa choiva, falta de usuarios…

O medo ao cambio é normal.  A día de hoxe ninguén critica as peonalizacións que se realizaron no centro, Praza de Galicia, Castelao, Rei dá  Viña… e que no seu momento tiveron multitude de críticas.

O cambio cara unha mobilidade urbana sostible é imparable. As directrices que marca a Unión Europea e os distintos entes que nos gobernan así o testemuñan.

O importante nunha  ciclovía, non é que sexa de cor verde, vermella ou amarela; é que sexa segura, estea  segregada das áreas peonís e da calzada pola que circulan os vehículos.

A falta inicial de usuarios é normal nunha sociedade que entende a bicicleta unicamente como lecer e non como un medio de transporte, cuestión que pouco a pouco irá cambiando. Por poñer un exemplo en  Copenhage un 62% dos desprazamentos ao traballo ou aos centros escolares realízase en bicicleta, isto é grazas ás políticas aplicadas que permitiron multiplicar por 3 o número de usuarios.

Nós esperamos que todas estas polémicas pronto pasen á historia e para iso é necesario que todos nos involucremos, acheguemos o noso granito de area con solucións e civismo.

Todo é susceptible de mellora.

venres, 3 de decembro de 2021

Redes sociais

Desde Arousa en Bici e grazas á colaboración dun novo socio, Pablo Pérez Martínez, que se incorpora con moitas ganas e ilusión, ímonos embarcar nunha nova aventura que nos permitirá chegar coa nosa mensaxe a favor da bicicleta e da mobilidade sostible a unha maior cantidade de persoas.

Desde este momento, estamos nas seguintes Redes Sociais:


Aínda así, necesitamos a axuda de todos vós para chegar a mais xente, polo menos ao principio, por iso pedímosvos que nos sigades e convidedes ás vosas amizades a que o fagan. Tamén podedes facernos chegar aquelas fotos, noticias ou outras cousas de interese relacionadas coa bicicleta para que as publiquemos nas distintas redes sociais.

mércores, 15 de setembro de 2021

Semana europea da mobilidade

Estamos de volta. Despois deste parón imposto pola pandemia regresamos con novos pulos.
Este ano colaboramos co Concello de Vilagarcía con motivo da Semana Europea da mobilidade que ten como lema: POLA TÚA SAÚDE, MÓVETE DE FORMA SOSTIBLE.
Veleiquí o programa elaborado polo concello:

A continuación salientamos a nosa participación:
SÁBADO 18 ás 21:00h  Paseo nocturno en bici.
É unha das actividades que a nosa asociación organiza coa intención de fomentar o uso da bicicleta na cidade. Pretendemos demostrar que tamén de noite é posible
 

O percorrido é o habitual. A saída será no parque do Cavadelo, iremos a Vilaxoán e a Carril e voltaremos ao parque do Cavadelo. Ao final celebrarase un sorteo de accesorios ciclistas e outras cousas entre todos os participantes.
 

Procurade vir con casco, mascariña e iluminación na bici.
LUNS 20 ás 17:30  Ruta en bici pola Vía verde do Salnés dende o aparcamento do Pazo de Rubiáns (Procurade vir con casco e mascariña)